【健身BB班】 休息係為咗再運動? - 超負荷與超量補償
好多接觸咗運動冇耐嘅朋友，都會有一種錯覺，就係覺得運動係要做得愈多愈密先叫夠。「要身體熟習運動嘅感覺先會進步㗎！」但係你嘅身體又會唔會因為你不斷嘅操練而得到理想嘅效果呢？
喺運動科學入面有個兩個terms，叫做超負荷同超量補償，就係講緊健身係點樣令你嘅身體變得更強。超負荷係指要喺訓練之中做出比原本嘅訓練強度再強多啲啲嘅意思。一般訓練會按照訓練者嘅能力去循序漸進咁加大訓練嘅力度，咁即係意味著你要用盡食奶嘅力，承受比平時訓練量更強嘅負荷，令身體適應之後，訓練嘅成效就會出嚟。所以「要身體熟習運動嘅感覺先會進步㗎！」係冇錯嘅，不過就要配合埋適量嘅休息先可以有效果。
而超量補償就係運動後透過休息去令身體進步嘅理論。喺做完訓練後我哋會覺得攰，力量就會下降；但喺足夠嘅休息底下，力量就會慢慢恢復同提升，甚至提升到超過之前未做訓練前嘅力量。當你再重複做週期性的訓練，休息，回復，理論上你的力量是能不斷提升的。
我哋可以將成個訓練嘅休息恢復過程分成3個階段，第一個階段係喺啱啱訓練完之後，身體會攰大約一至兩個鐘；之後進入第二個階段嗰一至兩日內，身體就會開始恢復，喺呢個時候補充營養就係首要嘅事嚟。而第三個階段就係超補償嘅階段，當身體恢復過嚟，亦都慢慢咁適應咗了之前嘅訓練，就會變得更強，然後可以再加強訓練嘅力度喇。
要記住，超量補償要配合兩樣嘢：訓練嘅強度同休息恢復嘅時間。如果訓練強度太勁，但係休息唔夠，就會變成過度訓練，表現下降，甚至受傷；如果訓練強度太弱，休得太耐唔練，就會把握唔到提升表現嘅好機會喇。
文字及照片來源於網路若有侵權請聯繫刪除
