【健身BB班】 伸展訓練要點做?
上次我哋講到新手要做伸展訓練去放鬆繃緊咗嘅肌肉，咁伸展訓練係要點做同埋伸展訓練有啲咩好處呢？
伸展有兩種，分別係動態伸展同靜態伸展。動態伸展係透過活動身體，令身體進入ready做運動嘅狀態，令訓練更有效果。動態伸展主要喺訓練前同訓練中嘅時候做，常見嘅動作有開合跳、高抬腿跑、踢臀跑、前後交互腳步側跑等。不過要留意番伸展嘅強度要由低開始先，先可以俾肌肉容易啲熟習運動嘅狀態。
而靜態伸展就係訓練後，用嚟伸長番訓練嘅時候縮短咗嘅肌肉。其實只要固定著做同一個動作，感覺到肌肉有啲繃緊就得。伸展大約一至兩分鐘，每邊手/腳只需要拉一次就得。
唔好以為靜態伸展係靜態嘅就唔緊要，忽視靜態伸展會令肌肉喺訓練過程中越嚟越緊，變相更容易受傷，所以有時候運動表現唔好，可能就係因為伸展訓練做得唔好。
不過無論邊種伸展都好，一定要有足夠嘅熱身同注意自己伸展嘅時候嘅姿勢，有好嘅運動習慣先會有好嘅訓練成果㗎！
