【心。識】點解我會有拖延症？(1)
「遲啲先做都未遲啦！」似乎我哋每一日都會浮現呢種諗法，無論係公事，抑或做家務，甚至係落去樓下買嘢，只要係要做啲麻煩嘅事，自己嘅拖延症就會發作，究竟點解會咁樣呢？
拖延症其實同大腦嘅前額葉皮質區同埋邊緣系統嘅功能有關。大腦嘅前額葉幫助我哋作出理性嘅決策，令我哋可以做到自我管理同埋長期目標規劃；而邊緣系統就負責掌管我哋嘅情緒同感受。由於邊緣系統比前額葉嘅功能更強，所以點解人通常會俾快感支配咗思考。
而當你想停低手頭上做緊嘅嘢，去做自己想做嘅事嗰陣，掌管理性嘅前額葉就會提醒你應該做好晒手上嘅事先好去玩，但係如果你唔去理會佢嘅話，前額葉就唔會再發揮作用，相反大腦另一邊嘅邊緣系統就會出嚟引誘你去做愛做嘅事，以獲取即時嘅快感。
而最弊嘅就係，當邊緣系統令到你嘅拖延症發作之後，仲會發動大腦嘅獎勵機制，令到你覺得，做自己想做嘅事令自己獲得滿足係更重要嘅事。所以你會發覺，當拖延症發作嘅時候，就冇得再番轉頭，只會令你愈嚟愈偏離自己所訂嘅時間表。
想知更多有關拖延症嘅嘢？記得留意下一期嘅「心。識」喇！
