【健身BB班】 運動如何改善圓肩？
唔少都市人長時間喺辦公室對住電腦工作，放工之後就成日低頭玩電話，久而久之就好容易有圓肩嘅問題。
可能你覺得圓肩冇咩問題啫反正咁多都市人都有，但係圓肩好多時都會伴隨住寒背、凸肚腩呢啲同伴一齊出現，試諗下縮膀背曲肚腩凸有邊個會鍾意呢個外型？而且圓肩嘅問題一路持續落去，肩頸就會好容易出現痠痛，進而影響到日常嘅工作同生活。
要知點改善圓肩首先要知道圓肩係點形成。圓肩其實係由於胸肌同後頸嘅肌肉習慣咗用力，令到肌肉太過繃緊，結果令肩胛骨、頸椎同脊椎向前彎曲咗。所以要改善圓肩，重點係在於放鬆番胸肌同後頸嘅肌肉。以下會教兩個簡單嘅動作俾大家放鬆自己嘅胸肩。
首先係要透過伸展運動去放鬆番胸肌，呢個其實可以喺平時都好容易做到。具體嚟講就係擴胸運動：首先搵幅牆靠住企，然後將手前臂平貼喺牆面，之後用固定貼喺牆上嘅手臂將身體前傾，直到覺得膀頭同胸肌有拉緊嘅感覺，30秒之後再換手做。
另一個動作需要用到瑜珈墊，首先將瑜珈墊擺近牆邊，面朝上瞓喺瑜珈墊度，然後抬高兩腳，膝頭彎曲到90度，再將腳掌貼喺牆度。擺好姿勢之後就將左手向上舉高，右手擺喺左手前臂嘅上面，然後將左手向腳嘅方向壓過去。做呢個動作嘅時候會感覺到膀頭向後縮。維持20秒後就換另一邊手，然後重複呢個動作10次。
其實除咗呢兩個動作之外，你亦都可以依靠一啲輔助器材例如彈彈帶去幫你達到更好嘅放鬆效果。不過記住要解決圓肩嘅問題係要靠長時間嘅耐性同恆心，堅持運動嘅習慣，同埋要多啲留意自己平時嘅姿勢，先可以徹底消除圓肩嘅問題。
文字及照片來源於網路若有侵權請聯繫刪除
