健康資訊


【心。識】點解我會有拖延症?(2)

2021-07-19

【心。識】點解我會有拖延症?(2)

 

上一集我哋講到我哋嘅腦內機制係點樣令我哋嘅拖延症發作啦,今集我哋就講下性格方面係點樣令拖延症一發不可收拾。

 

根據《今日心理學》呢本書所講,容易俾拖延症控制嘅人主要有五類,分別係對唔逼切嘅事欠缺危機感嘅人、容易感到無助嘅人、害怕失敗嘅人、自視過高嘅人同缺乏自制能力嘅人。

 

對唔逼切嘅事欠缺危機感嘅人,會對好多要做嘅事都用「冷處理」嘅方式解決。佢哋覺得啲事就算聽日唔做,都唔會有咩大不了,反正來日方長遲下再做都唔怕。其實呢樣係嚟自人類本能嘅認知錯誤,令佢哋比起長遠嘅價值,更容易著眼於當前嘅考量。而呢種心態喺心理學上就稱為「時間折扣」。

 

有啲人其實並唔係想拖延件事,反而係好想做好佢,只不過係唔識點開始去做嗰件事。尤其當有啲無助感好強嘅人遇到一件從來都冇做過嘅事,覺得身邊冇人幫到自己,無助感就更加強烈,令到壓力暴增、思路混亂一片。為咗排解無助感帶來呢負面情緒,佢哋就好自然咁逃避件事,件事進度嘅就只有無限期咁延遲落去。呢種拖延通常就稱為「效率拖延症」。

 

另一啲好驚面對失敗,所以為咗保持佢哋嘅面子而乜都唔敢做。佢哋非常重視其他人對自己嘅評價,接受唔到人哋覺得佢「能力不夠」,而自己說服咗自己只係懶得做件事而唔係怕自己做唔到件事。佢哋會有少少完美主義嘅傾向,但係因為定嘅標準太高,所以無論點做事都獲得唔到成功感,反而令佢哋更容易因為怕人哋嘅負評而消極做事,而俾拖延症控制。

 

有啲人衰喺拖延症手上,就係衰咗太有自信。佢哋會因為過往嘅經驗而堅信事情早啲開始做,並唔會有更好嘅效果,反而將件事拖到最後一刻,自己嘅實力先會逼到出嚟。呢班Deadline fighter唔出過事係唔會識醒,就算出咗事都只會覺得問題係出喺事情難度太大,或者係被突發嘅情況所阻撓,而察覺唔到問題係出喺拖延症度。

 

而更多更多嘅人有拖延症係因為自己缺乏自制能力。由於身邊嘅誘惑太多,而且佢哋好容易分心,所以佢哋會將自己偏好嘅事擺喺較優先嘅位置。當時間一分一分咁過去,都冇掂過本來應該要做嘅事,結果就令件事不知不覺咁遲咗完成。而更慘嘅係,拖延症係幾乎支配緊佢哋日常生活每分每刻嘅時間安排。

 

唔知你哋會唔會屬於以上所講嘅其中一種人?不妨喺留言區度寫低你係屬於邊種人啦!下一期嘅「心。識」我哋就會講下點樣做先可以對付你嘅拖延症,記得留意下一期嘅「心。識」喇!

 

文字及照片來源於網路若有侵權請聯繫刪除