健康資訊


【健身BB班】 想增加肌肉量要點做?

2021-07-30

【健身BB班】 想增加肌肉量要點做?


相信唔少人,無論係唔滿意自己身形又好,定係肌肉量不足都好,都會希望透過健身去增加肌肉量。咁你又知唔知要有效地增肌要點做呢?


首先第一,係要令自己攝取嘅熱量增加。雖然好多人都知如果要達到增肌嘅效果,就要食多啲嘢,但係其實咁只係啱咗一半啫。其實我哋係要配合自己嘅體質去食嘢。例如自己屬於易瘦體質嘅,由於身體嘅新陳代謝率比較高,所以就要增加卡路里同碳水化合物嘅比例;相反如果你係易胖體質嘅,就要較避免食太多澱粉。


第二因為增肌嘅材料就係蛋白質,所以要增肌有成就要攝取更多蛋白質。可以嘅話甚至用更多嘅蛋白質代替油脂或者糖嚟補充熱量。但係我哋其實唔太可能三餐都全部都係食蛋白質,因為咁樣會對我哋嘅腎造成好大嘅負擔。所以好好咁分配每餐嘅營養攝取就顯得非常之重要。每餐食多啲低脂嘅肉類,例如雞胸肉、雞蛋、海鮮、低脂牛奶之類。


第三樣就係要平均咁訓練自己嘅肌肉。好多人為咗貪好睇,就將心力只係用嚟練手臂同腹肌。其實咁樣係唔會令我哋成個身形變得好睇。反而練多啲對腳、背脊同胸肌,去令多啲發達嘅肌肉支撐成個人,咁先會好睇。平時做多啲深蹲、臥推、肩推、撐艇同埋硬舉,其實係可以練到身體最多部位嘅肌肉,做得多你嘅身形亦都會有好明顯嘅改變。


不過都要記住,除咗食得好同充足嘅訓練之外,俾肌肉有充足嘅休息都係令肌肉增大嘅重要元素嚟(請參考超量補償嘅嗰篇文章)。如果你睇完覺得對你嘅增肌計劃有幫助嘅,不妨share俾同你一樣操練緊肌肉嘅朋友仔㗎!

 

文字及照片來源於網路若有侵權請聯繫刪除