健康資訊


【健身BB班】 辦公室一族必學的伸展運動

2021-07-23

【健身BB班】 辦公室一族必學的伸展運動

 

相信大部分辦公室一族長期坐喺對住電腦,又缺乏郁動,好容易就會有一身痛症。以下就會教幾個伸展動作俾大家,等大家可以喺冇時間做運動嘅情況都可以稍微紓緩一下自己嘅肩頸膊痛。

 

第一個動作非常簡單,就係伸展我哋嘅胸小肌。首先將我哋嘅雙手交叉放到背後面,然後用力拉開我哋嘅肩胛骨,雙手伸直向後舉高。做嗰陣你會感受到肩胛骨嘅筋腱,甚至膊頭會扯住,多啲做呢個動作其實都有效去改善我哋嘅圓肩。

 

第二個動作可以改善我哋高低膊嘅問題。首先身體挺直站立,雙腳同膊頭保持相同寬度。住將頭側向一邊,同時將高咗嘅嗰邊膊頭向下壓,做完一邊之後就放鬆然後轉另一邊。做嘅時候你會感覺到肩頸嘅肌肉都會有拉扯嘅感覺,呢個係有助你放鬆番太緊嗰一邊嘅上斜方肌同肩胛提肌嘅。

 

第三個動作,係透過「縮下巴」去糾正頸部。首先將食指放喺下巴前面,眼向前望,頭部向後移,收緊下巴,2秒左右之後放鬆,重覆做5-10次。呢個動作可以幫你用郁動胸椎同頸椎關節嘅方法去減少肌肉繃緊。

 

以上三個動作都非常簡單,唔需要借助任何器材,只要每日抽少少5-10分鐘去做,就可以有效減輕我哋嘅辦公室痛症。如果你鍾意呢一篇文章嘅,歡迎你share俾你身邊嘅辦公室一族㗎!

 

文字及照片來源於網路若有侵權請聯繫刪除